
متضايقة
و حاسة انى مش فايقة
والناس عايزانى اتكلم
واضحك واهزر واسلم
بس بجد مش رايقة
ومهما اقول بالذوق
سيبونى شوية متضايقة
يقولوا خلاص على راحتك
على ايه هى متعايقة
!!!
اكتم فى نفسى و اقول
طب ادارى
يمكن يخبى قناع الابتسام نارى
يمكن ابين
ان قلبى ليهم شارى
و انا عن نفسى معاهم
ببقى بعيد اوى عن دارى
و الدار فى القلب
وده قدرى مش اختيارى
و اقفل على نفسى باب اودتى
و اراجع مع نفسى حدوتتى
احكيها لنفسى
او لعصفورتى
و اسألها
اعمل ايه فى مشكلتى؟
الاقيها تبص وتستغرب
ومن عيونها الاقينى بهرب
مانا برضو اللى حابساها
يبقى ازاى استناها
تفتحلى هى باب سجنى
وتجاوبلى مسألتى
!!
وارجع مكسوفة على سريرى
انا وعذابى وضميرى
انا عذبت عصفورة
وعذبنى انا غيرى
بس انا حبيتها
وشاركتها فى وحدتها
ياريت غيرى كان زيى
ومكانش سرق ضيى
بس برضو فى تفكيرى
فضل مأنبنى ضميرى
قمت للعصفورة بصيت
قلتلها ترجعى لاهلك؟
للسما والنور و الغيط؟
و ضحكتلها و استنيت
لقيت عيونها بتدمع
وبتقللى بجد؟ ياريت!
قلتلها خلاص هافتحلك
وبالحرية اصرحلك
ولو ان قلبى
دايما هيفضلك بيت
يلا خلاص طيرى
و لما تعرفى غيرى
ابقى احكيلهم عن جرحى
و عن عذابى و ليل فرحى
وقوليلهم
عمرى ما نسيت
عرفيهم انى سبتك
و اهون عليا ماضيعكيش
بحبى ليكى حبستك
وبرضو انتى مجرحتيش
عرفيهم انك طير
ووفيتى اكتر من البشر
عرفيهم انك عشانى بكيتى
وكانت قلوبهم حجر
وقوليلهم هى مسامحة
كل من بيها غدر
وقوليلهم انى نجمة
ضلت طريقها للقمر
وجت على كوكب
كله وحوش وحجر!
